«Ամուսնացել եմ գումարի համար, կղզիս էլ շատ եմ սիրում». Սիրուշոյի գրառումը

52

Երգչուհի Սիրուշոն սարկազմային գրառմամբ անդրադարձել է իրեն ուղղված քննադատություններին եւ իր անվան շուրջ հյուսվող ասեկոսեներին.

«Ես հայրենիքի համար ոչինչ չեմ արել. երգել եմ թուրքական ելեւէջներով երգեր ու հիմք եմ վերցրել ոչ թե, օրինակ, Կոմիտասից, այլ Իբրահիմից։
Հագուստներս ստեղծել եմ թուրքական մոտիվներով ու ոգեշնչել եմ ինձ հետեւող մի ամբողջ սերնդի էլ կրել նմանատիպ թուրքական հագուստներ ու զարդեր։

Ամուսնացել եմ գումարի համար, չնայած, որ Լեւոնի հետ ենք 14 տարեկանից ու անցել ենք բոլոր հնարավոր դժվարություններով, բայց միակ բանը, որ ինձ իր հետ կապում է՝ գումարն է. թե իրեն ինչն է կապում ինձ հետ, նույնիսկ չգիտեմ։

Ապրում եմ Ամերիկայում, բայց ինչ-որ հրաշքով երեխաներս դպրոց եւ մանկապարտեզ հաճախում են Հայաստանում. տնից դպրոց ճանապարհը մոտ 17 ժամ է ստացվում, բայց ոչինչ, շուտ ենք արթնանում։

Ամեն ինչ անում եմ ուրիշի գումարներով, անկախ այն բանից, որ փոքր տարիքից ամենաբարձր հոնորարներն եմ ստանում, ու որ Pregomesh-ն ամենաշատ վաճառվող հայկական ապրանքանիշներից է։

Ու ընդհանրապես, երբ որ ես համերգ եմ ունենում, տոմս գնելիս, ոչ թե մարդիկ են վճարում, այլ ես եմ իրենց վճարում։

Գումարներս էլ որոշել եմ ծախսել ոչ թե, օրինակ, հայերի մասին պատմող ու հային աշխարհին ներկայացնող «ARMAT» ծրագրի վրա, այլ ինձ հագուստներ ու պայուսակներ եմ գնում։

Սիրածս բառը հայերեն լեզվում՝ «շքեղ», ու ցանկալի է, որ դա լինի դղյակի կամ ավտոմեքենայի տեսքով, որովհետեւ ես մատերիալիստ եմ՝ բացարձակ ուրիշ արժեք չեմ ճանաչում։

Նաեւ անտաղանդ եմ, դե ծնողներիցս ի՞նչ պիտի ժառանգեի, ու անհասկանալի է, թե ինչպես եմ գրել, օրինակ, «Հավատում եմ», «Պռեգոմեշ» ու մյուս բոլոր երգերը։

Բարեգործություն էլ երբեք չեմ արել, որովհետեւ, եթե արած լինեի, կնկարեի, կհրապարակեի, թե չէ էլ ուրիշ ինչի՞ համար է բարեգործություն անելը: Հետո, եթե բարեգործություն անեմ, ստիպված պետք է կղզիս վաճառեմ, իսկ ես այն շատ եմ սիրում. կախարդական փայտիկիցս մի քիչ քիչ, բայց միեւնույն է՝ շատ:

Միջազգային միջոցառումների հրավիրվելիս էլ հատուկ խնդրում եմ, որ չխոսեն հայ լինելուս մասին, ու անում եմ ամեն ինչ, որ մտածեն` Բուրկինա Ֆասոյից եմ:

Էլ ինչ, եթե ինչ-որ բան բաց թողեցի, համոզված եմ, կգտնվի մեկն, ով կասի՝ «չէ, դա հաստատ ա, ինձ նենց մարդ ա ասել…»»:

Սիրուշոն իր գրառման վերջում բոլորին մաղթել է բարություն, խաղաղություն ու խելամտություն: